قالت وزارة الأوقاف عبر صفحتها الرسمية على موقع التواصل الاجتماعي “فيسبوك”: "صلاة العيد يوم بهجة وعبادة، بنجتمع فيه على التكبير والتهليل، وده مشهد من مشاهد تعظيم شعائر ربنا، فلازم يكون بالشكل اللائق، زي ما ربنا قال: "ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ" (الحج: 32)".
وأضافت: “لكن للأسف، بقت بتتكرر مشاهد مش لائقة في صلاة العيد، زي الزحمة الشديدة، والاختلاط العشوائي بين الرجال والنساء، وبعض الناس اللي بتصلي في غير اتجاه القبلة بسبب الزحام”.
واستكملت: “سيدنا النبي ﷺ علّمنا النظام واحترام الصلاة، وده معناه إن الصلاة ليها نظام واضح، ولازم نحترمه عشان نحافظ على روح العبادة والخشوع”.
ولفتت: "من الزحمة والعشوائية، ساعات بنلاقي ناس بتصلي في اتجاه غلط! وده خطأ كبير لأن استقبال القبلة شرط لصحة الصلاة، وربنا قال: "فَوَلِّ وَجْهَكَ شَطْرَ الْمَسْجِدِ الْحَرَامِ" (البقرة: 144)".
وأكدت وزارة الأوقاف: "وسيدنا النبي ﷺ قال: "إذا قُمتَ إلى الصلاةِ فأسبغِ الوضوءَ، ثم استقبِلِ القبلةَ فكبِّرْ" (متفق عليه) يعني لازم نهتم إننا نصلي في الاتجاه الصح، وده مش هيحصل إلا لو التزمنا بالنظام وتجنبنا الفوضى".
وحرصت وزارة الأوقاف على تجهيز عدد كبير من الساحات والمساجد في كل المحافظات عشان تضمن إن الصلاة تتم في أجواء منظمة، ومن أهم الترتيبات:
- أماكن محددة للرجال وأماكن للنساء، فلازم نلتزم بيها.
- كل واحد يروح أقرب ساحة ليه بدل ما يتكدس في مكان بعيد بدون داعي.
- اتباع تعليمات المشرفين والمنظمين عشان الصفوف تبقى منتظمة والصلاة تطلع بالشكل اللائق.
- صلاة العيد مش مجرد تجمع والسلام، دي عبادة عظيمة لازم نحافظ على قدسيتها. كلنا مسئولين عن نجاحها، فبلاش الزحمة العشوائية، وبلاش الفوضى، ونلتزم كلنا بالنظام اللي هيخلينا نصلي في راحة وخشوع.
0 تعليق