أجابت الدكتورة هينار عادل، مدرس علم النفس الإرشادي بكلية التربية – جامعة القاهرة، على سؤال من إيمان من محافظة القليوبية، وهي أم لطفل من ذوي الهمم يعاني من فرط حركة وتشتت انتباه (ADHD)، وتريد أن تعرف كيف تتصرف أو أهم العلاجات له؟.
أطفال من ذوي الهمم
وأوضحت مدرس علم النفس الإرشادي بكلية التربية – جامعة القاهرة خلال حوار مع الإعلامية مروة شتلة، ببرنامج "البيت"، المذاع على قناة الناس، اليوم الثلاثاء: "مهم نبدأ من الأول بخطوات مدروسة تساعدك وتساعده، الأمهات اللي بيكون عندهم أطفال من ذوي الهمم بيكونوا مستنزَفين نفسيًا وذهنيًا وبدنيًا، لأنهم بيتحركوا بين الخوف والقلق على المستقبل، ومحاولات التكيف مع طفل عنده احتياجات مختلفة".
وأشارت إلى أن أول خطوة هي تنظيم التغذية: "الأكل بيفرق جدًا، خصوصًا في حالات فرط الحركة، فلازم تقليل السكريات والحلويات، لأن الدراسات بتأكد إنها بتزود النشاط الزائد.. ضروري تتابعي مع دكتور تغذية متخصص في الحالات دي، وهيساعدك تحطي له نظام غذائي يهدّي شوية من التوتر والانفعالات".
وتابعت: "كمان مهم الطفل يفرّغ الطاقة بشكل صحي، زي السباحة مثلًا، بتفرق قوي مع أطفال ADHD، لأن المجهود البدني المنظم بيساعدهم يهدوا ويسيطروا على نفسهم".
أما بالنسبة لاختيار الحضانة، فأكدت: "الدمج مهم جدًا، إن الطفل يكون وسط أطفال تانين، لكن بشرط إن الحضانة يكون فيها أخصائي نفسي أو أخصائي ذوي احتياجات خاصة.. الشخص ده مهمته إنه يهيّأ الطفل للدمج، ويهيّأ الأطفال التانيين كمان لاستقباله.. لازم يبقى فيه وعي داخل الحضانة بالحالة عشان ما يتعرّضش لمواقف تنمر أو عنف من أطفال تانيين".
وشددت على أهمية وضوح الأم مع إدارة الحضانة: "مافيش داعي للخجل، لازم تكون الأم واضحة: ابني عنده كذا وكذا، وطبيعة حالته كذا. الشفافية بتفرق جدًا في تعاملهم معاه، ضروري جدًا المتابعة المستمرة مع الطفل بعد خروجه من الحضانة. اسأليه: كان مبسوط؟ فيه حاجة مضايقاه؟ المتابعة دي مفتاح لتعديل أي مسار من بدري".
0 تعليق