تحدث الفنان حازم إيهاب فى بودكاست فايق ورايق مع الإعلامي إبراهيم فايق، عن رحلة فقدان نجله، وذلك بعد تصدره تريند جوجل خلال الساعات الماضية.

قال  "إيهاب" فى بودكاست فايق ورايق مع الإعلامي إبراهيم فايق: "بعد 4 شهور من الزواج، اكتشفنا إن منة حامل، ورغم إن ماكنش فيه شغل وقتها، قلت الولد بييجي برزقه، والحمد لله الأمور كانت ماشية كويس، لكن في الشهر الخامس، خلال متابعة الحمل، طلبت الدكتورة نعمل فحص إيكو لقلب الجنين، وهناك اكتشفنا إن واحدة من غرف قلبه مش شغالة".

وتابع: "كنت بطمن منة رغم إن الحقيقة كانت تقيلة، وبدأت أسأل الأطباء، وكلمت شيخ من الأزهر قالي إن في الحالة دي يجوز الإجهاض، لكن لما عرفت إن فيه خطر على حياتها، قررت نكمل الحمل وقلت يمكن ربنا يرزقنا بمعجزة".

وأوضح: "يونس اتولد، وبعد 6 ساعات بس دخل يعمل أول عملية جراحية، وكانت منة فاكرة إنه في الحضانة بنفس المستشفى، لكنه كان اتنقل لمستشفى تانية وعمل العملية، وكان لسه فيه أمل، لكن القلب ماكنش قوي كفاية".

وأضاف: "قعد 13 يوم في المستشفى، وبعدها احتاج لعملية تانية، لكن للأسف ما نجحتش، والدكتور خرج قال لي جملة زي اللي بنسمعها في الأفلام: إحنا حاولنا، بس جسمه بينهار".

واختتم  الفنان حازم إيهاب حديثه: "أنا كنت مصدق إنه هيعيش، وبدأت أجهز له السرير، لكن الحمد لله على كل حال، ربنا اختاره، وده يمكن كان أكرم له ولينا.. وإن شاء الله يكون شفيع لينا في الجنة".