حذرت سيدة من التعامل مع مستشفى تبارك بالقاهرة الجديدة، بعد تجربتها مع المستشفى بعد إصابة ابنتها الرضيعة بضيق فى التنفس.
وقالت السيدة مستعرضة تجربتها: “ده تحذير من مستشفى تبارك القاهرة الجديدة عشان حرام ماتبهدلوش عيالكوا في مكان مهمل زي ده بنتي ٣ شهور وديتها مستشفي تبارك دخلت الطوارئ و قالوا عندها ضيق تنفس من الدرجة التانية و التهاب رئوي و لازم تتحجز في الحضانة”.
وتابعت عن تجربتها مع مستشفي تبارك: "اتحجزت الخميس الفجر الساعة ٤ وقالولنا خلاص امشوا و تابعوا الحالة بالتليفون و تعالوا في مواعيد الزيارة.. تاني يوم الصبح يوم الجمعة الساعة ٨ بكلمهم محدش بيرد عليا و اتصلت ب الرقم الارضي قالي مش هعرف احولك ع الحضانة كلمي الاستقبال و معرفتش برضو اوصل للاستقبال ف اضطريت اروح.
واستطردت: "وصلت و طلعت الحضانة فتحتلي الممرضة باقولها انا بتصل و محدش بيرد.. قالتلي الموبايل مع الدكتور.. قولتها طيب هاتيلي الدكتور وعايزة ادخل اشوف بنتي قالتلي لا ده مش ميعاد الزيارة!
قولتلها طيب هاتيلي الدكتور بتاعها جه الدكتور بيقولي انتي جيتي ليه!! ده مش ميعاد الزيارة!قولتله انا جيت عشان محدش بيرد ع الرقم اللي انت اديتهوني امبارح.. قالي الرقم مع التمريض مش معايا!!!
قولتله الممرضة قالت ان الرقم معاك.. طيب المهم دلوقتي طمني علي بنتي اخبارها ايه؟! قالي لا الحالة مش هتتحسن بين يوم و ليلة!".
وقالت: “قولتله اه انت واضح انك مابصيتش عليها اصلا من امبارح ولا انت ولا التمريض عارفين عنها حاجة.. طيب انا عايزة بنتي هنقلها مستشفي تانية..قالي لازم يبقي في مكان تاني متأكدة انه موجود ليها في الحضانة عشان ماينفعش تتشال من ع الاكسجين قولتله تمام علي مانخلص اجراءات الخروج هكون لاقيت مكان تاني.. المهم طلبت اسعاف قالولي لا ماعندناش اسعاف و انا شايفة عربية الاسعاف واقفة تحت اودام المستشفي و مكتوب عليها مستشفي تبارك”.
وقالت: "طلبت اسعاف من شركة خاصة والاسعاف اتأخرت و اجراءات الخروج خلصت علي طول قبل ما الاسعاف توصل.. الاقيهم مخرجينلي البنت و شالوها من ع الاكسجين رغم ان ده خطر عليها علي حسب كلام الدكتور ف بقول للممرض انتو خرجتوها ليه دلوقتي لسة الاسعاف ماوصلتش.. قالي لا ما خلاص تصريح الخروج طلع لازم اخرجها حسبي الله و نعم الوكيل في المكان ده و الناس اللي شغالة هناك من اول الدكتور و التمريض ل حد الموظفين اللي استخسروا فينا الاسعاف و كأننا هناخدها ببلاش
ب مناسبة الفلوس".
وقالت: "المستشفى الحقيرة دي خدت مننا في ٥ ساعات بس ١٥ الف جنيه 15 الف مقابل الإهمال والدكتور النبطشي اللي نايم طول الليل و التمريض اللي معندوش رحمة ولا قلب و استجري يشيل طفلة رضيعة ٣ شهور من ع الاكسجين و هي محتجاه".
0 تعليق