استغاث شاب بالمسئولين والنيابة العامة ووزارة الداخلية والمجلس القومي للمرأة، لانقاذ شقيقته من مصير نيرة أشرف ، بعد تلقيها تهديدات من خطيبها السابق.

وسرد شقيق الفتاة ما حدث معها قائلا، منار أختي بقالها أكتر من 5 سنين بتتعرض لتهديدات مستمرة وتشهير وتحريض وابتزاز من الشخص الموجود في الصور والمدعو " هشام محمود كمال حمدون" من محافظة الفيوم. ووصل الأمر في مرة من المرات إنه أجّر بلطجية عشان يهددها، ورفع عليها العديد من القضايا الكيدية اللي تم حفظها.

وتابع: "على مدار خمس سنين لجأنا لكل الطرق القانونية، وبشكل شخصي كنت رافض تمامًا فكرة النشر عن الموضوع، عشان الأضرار النفسية والضغوط المجتمعية اللي ممكن تقع على أختي، ولكن بما إنها كده كده متضررة وبما إن فاض بينا الكيل، فمضطر أتكلم علانية عن اللي بيحصل بقاله خمس سنين بدون أي تحرك أو حماية من الجهات المسؤولة رغم لجوئنا لكل السبل.

واستطرد،" لجأنا لأقسام الشرطة، ومباحث التليفونات، ومباحث الانترنت، والنيابة العامة، والمجلس القومي للمرأة، ومنظمات المجتمع المدني. فمش فاهم نعمل ايه تاني عشان نحمي منار من مصير نيرة أشرف، وإن شخص مختل بيطاردها ويهددها بقاله خمس سنين، وبالفعل أخدنا ضده حكم من المحكمة في أحد القضايا سنة 2024.

وقال،" وأنا بكتب البوست ده بعد ما فاض بينا الكيل، وبحاول إني أوصل الصوت، لمؤسسات الدولة والجهات المسؤولة والإعلام والمنظمات الحقوقية والمنظمات النسوية. فكمان لو حد يقدر يساعدنا، يكون مشكور جدًا.

وتابع: نبذة عن أفعال الشخص ده، خلال الخمس سنين اللي فاتوا:

１- كان اتقدم لأختي في 2019، وبعد 3 شهور، أختي فسخت الخطوبة من ناحيتها.

２- من وقتها بدأ يشتري خطوط تليفونات غير مسجلة ويبعت منها رسائل تهديد لأختي وأمي، وسب وقذف وطعن في العرض والشرف والكرامة.

３- حسابات وهمية على فيسبوك وواتساب وتليغرام، وينشر على المجموعات الخاصة بمحافظة الفيوم تحديدًا، صور لأختي مع التشهير بيها والطعن في شرفها، ويبعت نفس الكلام لأقارب ومعارف وأصدقاء مقربين من العائلة، ويبعت يهدد أسرتي ويقولهم "أنا هخليها ترند".

４- حاول أكتر من مرة تلفيق اتهامات بالمخدرات والدعارة، بل واتقدم بطلب للنيابة لكشف العذرية والمخدرات.

５- اتقدم ضدها بعدد كبير من البلاغات الكيدية، واللي أرفق فيها مستندات مزوّرة ومفبركة، وجميع البلاغات تم حفظها إداريًا، ولم يتم التحقيق معاه في هذا الضرر النفسي أو في المستندات المزورة اللي قدمها.

６- بعد فسخ الخطبة بالتراضي، استأجر بعض البلطجية لتهديد أختي والتشهير بها، ونشر رقم هاتفها الشخصي بشكل عشوائي على مواقع التواصل الاجتماعي ولعدد غير معلوم من الأشخاص والبلطجية، مع إبلاغهم أنه رقم فتاة تعمل بالدعارة، لتبدأ في استقبال رسائل ومكالمات ذات محتوى جنسي من أشخاص لا تعرفهم، وبعضهم يشرع في تهديدها، الأمر الذي اضطرها لتغيير رقم هاتفها، وقامت بتحرير بلاغ ضد المدعو هشام رقم 643 لسنة 2020 بتاريخ 16 فبراير 2020. وتم تجاهل البلاغ لحد ما تم حفظه.

７- في يوم 11 يوليو 2023، استقبلت منار على هاتفها عدد من الرسائل المكتوبة والصوتية على تطبيق واتساب، يقوم فيها هشام بالسب والقذف والتشهير والتهديد لمنار ولأمي، وتم تحرير محضر بالواقعة رقم 124 لسنة 2023 جنح اقتصادية الفيوم. وصدر ضده حكم في 27 نوفمبر 2024 بالغرامة عشرين ألف جنيه والتعويض خمسة آلاف جنيه، من محكمة بني سويف الاقتصادية.

على صعيد آخر، دي أرقام بعض البلاغات الكيدية اللي اتقدم بيها وتم حفظها إداريًا:
- بلاغ رقم 19063 لسنة 2023 جنح أول الفيوم بتاريخ 2023/9/28 - تم الحفظ إداريًا.
- بلاغ 6475 لسنة 2023 إداري أول الفيوم بتاريخ 2023/10/10 - تم الحفظ إداريًا،
- بلاغ رقم 6101 لسنة 2023 إداري أول الفيوم بتاريخ 2023/9/27 - تم الحفظ إداريًا.
- بلاغ رقم 4226 لسنة 2023 إداري أول الفيوم بتاريخ 2023/7/11 - تم الحفظ إداريًا.
- بلاغ رقم 7252 لسنة 2023 إداري أول الفيوم بتاريخ 2023/10/31 تم إرسالها عن طريق التلغراف إلي النائب العام - تم حفظها إداريًا.

８- مش كده وبس، لكن كمان بيهدد أخواتي وبيرفع عليهم قضايا كيدية أخرى بمستندات مزورة.

９-  يوم 17 يوليو 2024، أختي زارت المجلس القومي للمرأة واتقدمت بمذكرة رسمية فيها ملخص للتفاصيل اللي حصلت والتهديدات والتحريض والابتزاز.

１０- كل الأمور دي، والحكم الصادر ضده، لم يثنيه عن أفعاله، لكنه مستمر حتى اللحظة في التهديد والتشهير.

واختتم رسالته قائلا" أمر أخير: هذا الشخص، بيستغل فكرة إن محافظة الفيوم مجتمع محافظ، ومستمر في إيذائه. هذا الأذي اللي مش فقط بيسبب أضرار نفسية للضحايا لكن كمان في مجتمع محافظ زي الفيوم ممكن يتحول لعنف مباشر إلى جانب لأنه بيأمن العقاب (لأسباب مش مفهومة، وكتير من الخطوات القانونية بتتعطل) فهو مستمر في انتهاكه للقانون ولخصوصيات ضحاياه، وقلت ضحاياه لأنها مش أختي فقط، إنما عنده نمط متكرر ولأننا على صلة وعلم بنساء أخريات بيعمل معاهم نفس الأساليب، لكن باقي الضحايا اختاروا السكوت والخوف… فمرة تانية، ايه مطلوب مننا نعمله عشان الشخص ده ياخد جزاءه بالشكل القانوني، وعشان نحمي ضحية جديدة من مصير نيرة أشرف؟ وطبعًا، معانا كل الوثائق والمستندات، وصور المحاضر والمحاكم، وسكرين شوت من كل الرسائل والبوستات والتهديدات والتشهير، والتسجيلات الصوتية، والأرقام والحسابات الوهمية اللي بيستخدمها.