قال عمر مرموش، لاعب المنتخب الوطني المحترف ضمن صفوف فريق أينتراخت فرانكفورت الألماني، إن تواجد المحترفين المصريين في الخارج وعلى رأسهم محمد صلاح لاعب نادي ليفربول الإنجليزي، يؤكد أن مصر لديها القدرة على أن تصل بأبنائها إلى أماكن عالية، مضيفًا: “احنا في مصر عندنا قدرة إننا نوصل لحاجات كبيرة وعندنا لاعيبة كتيرة عندهم موهبة إنهم يقدروا يوصلوا لحاجة كبيرة”.

وأضاف مرموش، خلال حوار خاص ببرنامج "صاحبة السعادة"، المُذاع عبر قناة دي إم سي: “علاقتي مع مو صلاح كويسة جدا واحنا صحاب ودايما بنتكلم ودايما بحاول أخد خبراته هو بقاله كتير في أوروبا، وهو بقاله سنين كتير ماشي كويس جدًا ودي حاجة كويسة إني في المنتخب اللي بلعب فيه في حد من بلدي مر بكل التجارب ووصل لحاجات كتير فبتساعدني إني أقدر آخد منه خبراته واسمع منه القصص اللي مر بيها”.

وتابع: “في نفس الوقت أنا عايز أعمل قصة لنفسي، مو صلاح طبعا حاجة كبيرة وأحسن لاعب جه في تاريخ مصر ومن أحسن اللاعبية في أوروبا، بس أنا مش عايز ابقى اللي بعد مو صلاح، ومو صلاح التاني لأ، أنا عايز أبقى عمر مرموش واعمل قصة لنفسي كل واحد عنده قصة وكل واحد ليه نجاحاته بتبقى مهمة بالنسبالة”.

وواصل: “واحد لعب ماتش في الدوري ممكن يبقى بالنسباله أكبر نجاح غير واحد خد كذا بطولة، بس طبعا باخد الخبرات من صلاح وبتعلم منه كتير وهو بيساعدني وبنتكلم مع بعض إزاي اتعامل مع مواقف معينة وأطور من نفسي وده طبعا حاجة حلوة جدا وشرف ليا ولمصر كلها إن احنا الاتنين في التوب5”.