استغاثت سيدة من شركة تبارك للتطوير العقاري بسبب عدم الالتزام ببنود التعاقد،  وحذرت من عدم التعامل معهم.  

وقالت صاحبة الشكوي ،" بما أن شركة تبارك للتطوير العقاري TBK نازلة ب launch جديد في 90 Avenue New Cairo حبيت أحذركم منها علشان محدش يحصله نفس اللي حصل معانا لأن مهم جدا انك تشتري مع مطور محترم و ليه سمعة كويسة و سابقة أعمال محترمة و بيحترم العميل اللي بيشتري معاهم ده للاسف مش حاصل معانا .
 

وتابعت،" من سنتين بالظبط تم شراء وحدة سكنيه دوبلكس آخر دور و الroof و كان المتفق عليه ان الاستلام ديسمبر ٢٠٢٤ مع العلم لحد الآن مستلمناش حاجة مع ان وقت الشراء من سنتين كان المبني قائم بالفعل و واقف علي التشطيب و ده اللي شجعنا وقتها علي الشراء لأن كان متوقع نستلم في معادنا.

وقالت،" كان موضح في ال brochure اللي فيه ال plan و اللي علي اساسه اشترينا بالإضافة الي اللي قاله مسؤول ال sales بتاع الشركة ان أسانسير العمارة بيوصل لل roof و ده اللي اتفاجئت مؤخرا ان مش حاصل و انه واقف بس لاخر دور و دي كانت حاجة ضرورية لأن والدي والدتي مش بيقدروا يستخدموا السلم بشكل مستمر فبالنسبة ليهم الدور اللي فوق كله مش accessible خالص دلوقتي".

واستطرد صاحبة الشكوي من شركة تبارك العقارية،" المساحات اللي في العقد غير مطابقة تماما للواقع و اصغر بأرقام محترمة عن اللي في العقد و تهدير كبير في المساحات لدرجة ان  حمام الضيوف في الدور العلوي مستحيل تقف فيه علي الحوض إلا إذا كنت واقف علي قاعدة الحمام مثلا منظر قذر و غير عملي تماما و ردودهم كلها استفزاز فيما معناه لو مش عاجبك اخبط رأسك في الحيط او استلم و عدل انت لو مش عاجبك".

وقالت،"المفروض الوحدة السكنيه بنستلمها متشطبة و احنا كنا دافعين مبالغ إضافيه علشان نستخدم خامات تشطيب احسن و نضيف حاجات كانت مش موجودة بالنسبة للتشطيب ال standard اتفاجئنا دلوقتي ان الحاجات دي ناقصة و مش موجودة و أنواع الرخام المستخدمة غير المطلوبة من الشركة و مستخدمين ال standardعادي جدا و البانيوهات الزيادة مش متركبة بحجة ان الحمام صغير و مش هياخد بانيو طيب حضرتك اخدت فلوسه ليه الزيادة لما هو مش متاح يركب ".

وتابعت،" وديعة الصيانة و دفعة الاستلام تم دفعها بالكامل في شهر ١٢ السنة اللي فاتت و شهر ٤ السنة دي علي اساس ان الاستلام في شهر ١٢ و لكن ده محصلش فالمفروض لو شركة محترمة كان طالما الاستلام محصلش وديعة الصيانة و اللي مبلغ كبير مش صغير أبدا تتأجل لحين الاستلام طالما هما متأخرين و طبعا مفيش اي طريقة للتواصل مع الشركة أبدا لمناقشة المواضيع دي".